اية المشكلة؟

اية المشكلة..هنا هنشوف اية الى صح و ناقص ف المجتمع و نزوده..و اية اللي زيادة و غلط و نشيله. يلا؟ يلا..
اية المشكلة لما نبقى مجتمع منظم؟
 اية المشكلة لما نشيل نفسنا بنفسنا..مانحتجش لحد ?
اية المشكلة لو بندي كل واحد حقه؟
اية المشكلة لما تقول كلمة حق لو على رقبتك؟
اية المشكلة لما نحس بقيمة كل مواطن؟
اية المشكلة لما نكرمهم؟ و نحسسهم انهم فعلاً مهمين؟
اية المشكلة لو شلنا من قلبنا الحقد؟و الاهانة؟و الكره اللى بيعمينا عن اننا نشوف الناس الصح؟
اية المشكلة لو بطلنا نحسس المُختلِف ان دة عيب او حرام؟
اية المشكلة لو فكرنا قبل ما نقول "احنا متربيين على كدة"؟
اية المشكلة لما نرفض قيود المجتمع؟
اية المشكلة لما تحط نفسك مكان التانى؟
اية المشكلة لو شِلت هم حد تانى؟..ما هو اكيد فى حد تانى بيشيل همك
اية المشكلة لو عاجبك حد تقوله؟
اية المشكلة لما تشجع حد؟
اية المشكلة لما تحل مشاكل التانين؟

أنا المشلول..

أنا المشلول ف احلامى..انا صورة واحد تانى..انا المشلول
أنا المسطول ف اوهامى..انا الخدام لأفكارى..أنا المسطول
أنا المشلول ف عيونى..أنا المسول ف مفهومى..انا المشلول
أنا المسطول ف خطواتى..انا المسطول ف احكامى..المسطول
أنا المشلول ف تغيري..أنا عايش عشان غيري..أنا المشلول
فى نهايتى أنا المشلول.ف تفكيري ماهوش معقول!..ف حركاتى انا المسطول..أنا المشلول

ازاى تعرف المصرى

عارف المصرى دة و الله غلبان..
شوف كام واحد يبجي عليه ف اليوم ة بردو بيقول "الحمدلله".
فى حد بيعمل كدة ف الدنيا؟
يبقى الرغيف ب5 قروش و كله زلط و زبالة و بيقول الحمدلله انه مش ب25 قرش.
يبقى عشان يركب موصلات تطلع عينه و بيقول الحمدلله ان ربنا مديني الصحة غيري ماعندوش النعمة دى..
يبقى بياكل فول كل يوم و تروح بيته يعزمك كام مرة و بعد الاكل بيقول الحمدلله على النعمه.
يبقى اب طالع عينه طول اليوم ف الشغل بس بردو بيقول الحمدلله عشان في غيره مش لاقي شغله.
تبقى ام و تشتم و تلعن  ف عيالها طول اليوم بس يوم ما تشوف ست مابتخلفش تقول الحمدلله.
يبقى ولد و مطلع عين امه و ابوه و يوم ما يشوف كفل يتيم بيقول الحمدلله.
يبقى متنكد عليه عيشته و مازال بيقول الحمدلله و بيضحك.
بأختصار شديد جداً..
المصرى هو اللي عايش حياته بالحلوة و المُرة.

قصة..أم الدنيا

دى قصة حياة واحدة عانت كتير..
الست دى بيسموها "أم الدنيا" ست طيبة و علي نياتها قوى لها اخوات كتييير قوى و هى اكبرهم، بس فى واحدة منفسنة منها دى اختها الصغيرة.
ام الدنيا دى بقى متجوزة واحد بقالهم تلاااااانييييييييييين سنة، كان مطلع عنيها..اصله كان بيسرق من مصروف البيت و يبغشها و بيخونها بس بردة كان مخاليها حاسة انها عايشة و لها ضهر..مع انه كان بيغلس علي عيالها..بس ارحم من اجواز ستات تانية.
بس يا سيدى،بعد كدة اتخنقوا مع بعض و فضل يعند ١٨ يوم بعد كدة حلف عليها يمين الطلاق و سابلها البيت و مشى.
بس خلي بقى واحد يعرفه ياخد باله منها بس هو اصلاًً كان واقف ف صفها..هو اه يشبه جوزها ف حاجات كتير بس هي كانت مفضلاه علي جوزها بما انه وقف ف صفها..لدرجة ان الناس افتكرت انه بيعمل كدة عشان يتجوزها
قاعدت كدة حواااالي سنة و نص هو اه شبه جوزها بس كان بيحاول يغير من نفسه..بس للأسف كان بردة له غلاطات بشعة  بس مازااااال ارحم منه.
لحد بقى ما عيالها رفضوا الوضع و قالوا لا احنا لازم نجوزها اصل الناس ابتدت تتكلم عاليها و دة مايصحش.
ام الدنيا كانت حلوة بصراحة و تتحب اصلها دة طبعاًً غير ان  كانت "شقتها تتوسط الحارة اللي كانت هي عايشة فيها" ف جالها عرسان ياماااااااا..
بس هي و ولادها كانوا عايزين عريس غير القديم..و اهم حتجة انه يعملها "عُرس ديموقراطى" دة غير ان مهرها غاااالي قوى ولا اجدع مرشح ف الانتخابات.
دة غير ان من اهم شروط الاختيار ان امه متكونش امريكية ولا يكون خارج م السجن..و يكون مش اقل من ٥٠ سنه..و يرضى على الاقل ٥٠٪ من عيالها.
المهم يعني انها ريسيت علي ٢ و معرفتش بقى تختااار انهي واحد الاولانى كان هربان من السجن..بي قالوا عليه متدين و ابن حلال و مربي دقنه، و التاني كان عارف الاتيكيت بس كان صاحب جوزها..و دة السبب اللي خلاها ترفضه.
عيالها طبعاً اختاروا المتدين ابو دقن.
بس،،الراجل من يوم ما اتحوزها و هو داخل على العيال بأزازة زيت و كيس سكر،،دة طبعا غير اللي ادهولهم من هدايا عشان يقبلوه.
لحد دلوقتى بقالهم ٨ شهور متجوزين،،بس دة طلع انيل من الاولانى! دة بيسرق و بيغش و بيخونها..لا و مع مين..مع اختها الصغيرة اللي منفسنة منها!!
ف شوية من عيالها رفضوا الحال اللي هي فيه..دة مصروف البيت بقى اقل بكتير قوى..الاكل و شرب قل..المياةو الكهرباء بتقطع! ف قالوا احنا لازم ننقزها و نبقي "جبهه" ضده.
بس هو دماغه انشف من الاولانى و مش راضي يسمع لهم ولا لمطالبهم و كل ما يقول هنزود المصروف..يقل اكتر م الاول
دة غير انه مريض يا حبه عيني..اصله كان جاله ورم اللهم احفظنا يعني زمان و مقصر على دماغه و طريقة كلامه..كان بيتهته ف الكلام و بيقف و بيهنج كدة!! ده غير انه كان بيتعصب عليها و على عيالها و يرفع لهم "صباعه" و يهددهم.
كذا مرة حاولوا يطلقوهم بس ماعرفوش للاسف.
و من عيالها الكبار قوى الاول:عالم ذرة سافر برة يكمل تعليمه و بقى حاجة كبيرة قوى يعني..بي مس كل الناس بتحبه
التاني:كل همه انه يبقى الكبير و مغرور و كل همه هو نفسه
التالت:دة بقى كبير ف السن و خلقه ضيق..بس بيعرف ف الاتيكيت.
مفيش حد عاجبها..أم الدنيا بقي!!
القصة ما أنتهتش علي فكرة..دى اسمها نهايه مؤقته لان القصة مستوحى من الحقيقة المعاصرة..
-الزوج الاول:محمد حسني مبارك
-الزوج التانى:محمد مرسي العياط
-المتقدم علي الزواج:احمد شفيق
-الابن الاول: محمد البرادعي
-الابن التاني: حمدين صباحي
-الابن التالت: عمرو موسي
يلاااااا ربنا يتولاها..و يصلح حالها..هييييييييييح دُنيييييا

عادى؟

هو انا لية مختلفة؟
هو انا الصح؟
ولا الناس  هى اللى صح؟
طب انا بسمع ام كلثوم و منير و كايروكى..عادى؟
مبتفرجش على تركى ولا مسلسلات حب..عادى؟
بحب أقرا شوية حاجات كدة مختلفة..بردة عادى؟
مبحبش اللون الPink..عادى؟
بنتقض البنات..عادى؟
بتكلم ف السياسة و بهاجم و برد ع الناس..عادى؟
طب سيبك منى شوية..
عادى ان البنت تلبس Skinny و هى مليانة؟
عادى انها تعاكس ولد؟
عادى انها تقبل منه اي شتيمة؟
عادى ان البنت تعمل نفسها رقيقة لمجرد انها شافت ولد جاى من بعيد؟
عادى انها تغيز ولد بولد تانى؟
عادى انها تضايق لمجرد ان صاحبتها صاحبت او اتخطبت؟
عادى انها تزعل عشان واحدة لابسة نفس الفستان اللى كانت هى لابساه الحفلة اللى فاتت؟
عادى انها تتصور و هى بتحضن صاحبها؟
عادى انها تحضنه اصلاً؟

رغاية انا صح؟ معلش كمل/ى بس الشوية اللى تحت

طب سيبك من البنات..نخُش على الولاد دلوقتى
عادى انه يشتم قدام بنات؟
عادى انه يشتم اصلاً؟
عادى انه يقلب اراجوز قدام البنات؟
عادى انه يشتم واحدة؟
عادى انه يلبس Skinny و بادى؟
عادى انه يسب الدين؟ هيقول لربنا يوم القيامه اغفرلى اصل انا ولد؟
عادى انه يعيش دور سي السيد؟
خلاص كدة بح..خلصت كل اللى عندى دة كل رأيي يتقبل او لأ..مازال دة رأيي

مش خايفين

بنتكلم ف السياسة و مش خايفين

ولا عملنلكوا حساب و لا منكوا مرعوبين

هنفضل نهتف ضدكوا و ضد كل الظالمين

ضد الى يقتل و الى يعذب و على اي كلام يقول أمين

ضد الى بيسرق و ينهب بأسم الدين

ضد الشيوخ الحرامية و الكدابين

ضد الى كدب و قال على حق الشهدا مستموتين

و هو زى الى قابله و كل الى ف السجن محتوطين

ضد الى قتل بطل الحرب و السلم آه الاتنين

ضد الى خرب و قتل و سجن و حرق و هو ف الأصل سجين

 ضد الى يقول حاجة و يرجع فيها بعد يومين

كُنا زمان

كُنا زمان نقول دة عيب و دة مش أصــــــــــــــــــول

يقول طيب أسف و دة تانى أنا مش هقـــــــــــــول

و لا عمرنا كُنا شعب عبيط ولا يوم كســـــــــــــــول

و يجى الشعب ف مرة يمسك الحكم لـــــــــــــدول

كُنا نقول اللــــه على كلام الســــــــــــــــــــــــــــت

دلوقتى شيوخنا ملهمش غير قناة الـــــــــــــــــتت

يحللوا حرامهم و يجوا لحللنا يقولوا حــــــــــــــــرام

محجبة..منقبة أنتى خارجة لية يا مــــــــــــــــــدام؟

هنهدم الأهرام و الآثار معلش أصلها أصنــــــــــــنام

أهلـــاـ و يا هلـــاـ و مرحــــــــــباً فى بلادنا الإسـلام

وحدة وطنية آه,,بـــــــــــــــــس التهنئة حــــــــــــــرام

دة لا مؤخذة لا دين و لا تربية ولا حتى عـــــــــــــلام

و يجوا على بقية الناس يقولوا " هــأ فلول نظــــــام"

تدافع عن مبارك يلبسوها مصيبة آه هى إلهـــــــــام

يعملوا ساعتها عُبط و يقولوا مين فينا الإمــــــــــــام؟

ما هيــــــــــــا البلد كــدة كــدة ماشية تمـــــــــــــــام

معلش أتقبض عليا مش هعرف أكمل الكــــــــــــــلام

أصلنا ف حكم الأخوان آه مفيش فايدة طب يلا سلام

جاوب..هتلاقى نفسك

هل ف مرة فكرت تقعد مع نفسك و تسألها كام سؤال كدة ع الماشى؟
أنا مين..أنا مين دة سؤال هيكشفلك حاجات كتير قوى مكنتش تتخيلها عن نفسك و عن شخصيتك و حالك..لأن دة مش سؤال واحد لأ دة كذا واحد ف بعض.
هل مثلا ف كرة فكرت تسأل نفسك
أنا ليه كدة؟
 أنا لية فيا الحاجات الوحشة دى و ليه ما أغيرهاش؟
 ليه بستنى لحد ما حد يجي يقولى و يكسفنى و بعدين بتضايق؟
ليه بصاحب فلان و فلان لأ؟
ليه أنا مش مختلف عن التانين؟
ليه على طول عندى عقدة النقص؟
 ليه بعامل بابا و ماما وحش؟
 ليه دايماً بخيب ظنهم؟
وهل هما بيعملونى كويس؟
طب انا لية مخلوق انسان؟
 ليه مش بطة مثلاً؟
ليه بشوف الحاجة اللى ف ايد غيري بس؟
ليه بضايق نفسى؟
ليه فكري مش زى الناس التانية؟
هو انا اللى صح؟
و الا انا اللى غلط؟
طب هو انا ليه بفكر دلوقتى؟
طب هو انا نفسي اعمل اية؟
ليه الناس بتبص لى انى مختلف؟
هو انا معقد؟
ولا الناس هى اللى معقدة؟
طب انا نفسي اعمل ايه بكرة؟
هو انا ليه مش مبتسم؟
ليه مبحمدش ربنا على أمى و أبويا و اخواتى و صحابى؟
جاوب على كل سؤال من دول هتلاقى نفسك..لقيت نفسك

زنزانة أفكارى

زنزانة أفكارى..هى المكان الحقيقى اللى أنا محبوسة فيه.
خالى بالكم..ال BLOG دى برده جوا دماغى..اهلاً بكم ف دماغى المستقلة هتتعرفوا عليا و عليها حبة حبة مع الوقت.
ف الحقيقة كل واحد مسجون جوا واحدة منها..لأنك بتفكر بيها مهما كانت الظروف.
عمرى مافكرت أخرج منها..لأنى بكدة هخسر كتييييير قوى و أول حاجة هخسرها هى نفسى لأنى هبقى عبدة لأفكار التانين و دى حاجة اى حد عمرى ما هيرضاها لنفسه الا و اذا كان مجبر أو أخوانى بصراحة.
و الBLOG دة اية غير شوية أفكار فوق بعض مكونين عالم بحاله و العالم دة هو مُخى.